Praat reg oor God F E B R U A R I E N E D G E R E F G E M E E N T E C O N S T A N T I A

Transcription

1 N E D G E R E F G E M E E N T E C O N S T A N T I A F E B R U A R I E Praat reg oor God Constantia. Dis vir die Kerk belangrik dat daar REG oor God gepraat word, sê ds. Wynand van Beek tydens n preek. Leuens oor God maak die lewe ondraaglik en verwring die boodskap van verlossing. Die Skrifgeleerdes en Fariseërs het gereken hulle had die waarheid beet. Hulle stoot tollenaars en sondaars weg en verdoem hulle. Aangesien hulle die gesig van die Kerk was, het sondaars geglo dis reg en daarom soek hulle nie meer na God nie. Hulle is verpletter. Dié leuen het gesê God het net die voorbeeldiges lief. Toe daag Jesus op die toneel. Hy was so anders as die voorgenoemde gesig van die Kerk en mense hang Hom aan. Die Skrifgeleerdes en Fariseërs se interpretasie het gewys dat diegene wat n goeie lewe lei, gered is. Jesus se gelykenisse is beelde van die geloofsgemeenskap wat aandui dat die lewe buite die liefdesgemeenskap nie moontlik is nie. Die Fariseërs en Skrifgeleerdes word patetiese pligplegers. Hulle voeg 613 bepalinge by die 10 Gebooie en probeer daardeur om God te behaag. So kan ons ook vroom bely dat ons God dien, maar ons lewe wys n genadelose Godsbeeld. Daardeur kan ons mense aan God laat wanhoop. Mense van die Kerk, het ander al so gedegradeer dat hulle moes glo hulle is nie goed genoeg nie. Ons voorlewing kan n beeld van God skep as n God sonder genade, sonder liefde. Maar Jesus eet saam met tollenaars, vertel vir hulle stories en sê God is anders as wat vir julle geleer is. n Som het een regte, logiese lyn, maar n storie kan verras; daar is vryheid in n storie. Die Fariseërs maak van die sondaar se lewe n som: tollenaar = sondaar = verlore, maar Jesus vertel stories en lê daardeur die hart van God se Liefde bloot. Die herder kan nie die verlore skaap laat verlore gaan nie. Die vrou soek na die munt totdat sy dit kry. n Pa verlang na sy kind en vou hom in sy arms toe. Ds. Wynand vervolg dat die Kerk baie dinge oor God kan sê, maar as hy die waarheid van God se soekende liefde nie hoor nie, staan hy buite. Slegs n gemeente wat eerlik is oor sy eie verlorenheid sal n boodskap hê vir die verlorenes buite die Kerk. n Gemeente moet n tuiskomplek wees vir mense sonder n tuiste. Tuistelose mense se terugkeer beteken vreugde. Die enigste regte getal vir God moet vol wees. Nie 9/10, of 99/100 nie, maar vol! (Uit n preek deur Ds. Van Beek op 5 Aug )

2 N E D G E R E F G E M E E N T E C O N S T A N T I A Bladsy 2 Liewe leser... Daar is `n spreekwoord wat lui dat alle begin moeilik is, ek weet. Maar die ou litte kraak darem maar woes so aan die begin van die jaar met die vakansie `n baie resente gebeure. Hier, skaars `n week die nuwe werkjaar in, is `n mens al weer in jou roetine en is dit glad nie so erg nie. Hoe doen `n mens in ieder geval niks? Ek het gedurende die vakansie by strandplekke `n draai gemaak en my verwonder aan die magdom mense wat `n magdom geld uitgee op `n magdom niksdoen. Dalk is kosmaak, eet en praatjies maak harde werk, maar daar kom weinig tot stand. Jou lyf wys die voorspoed en jou fiksheidsvlakke is juis dit: vlak. Maar rus is nodig om die batterye te herlaai. Net om iets anders te doen is al vakansie. Die Engelse beweer dit mos al lankal. So kry plante `n ander groeiplek in die tuin; hulle staan in ieder geval al te lank waar hulle was. Die geute word skoongemaak, want as die groot reëns kom, is dit te laat. Hoekom houtwerk nie mooi kan bly nie en voortdurende behandel moet word, moet iemand tog asseblief verduidelik. En waarom bome nie aan hulle blare kan vasklou nie... Ek dink in ieder geval bome is almal vroulik. Nes hulle op hulle mooiste lyk met die nuutste blarerokkies aan, dan is daar fout mee en moet die voorkoms verander word. Argeloos word die kledingstukke verruil vir ander en die arme tuinier moet dit optel. Party van die takke is waagmoediger as die ander en waag dit met bitter min blare aan tussen die ander welgeklede genote. Hulle val op, maar is nie veel om na te kyk nie, want bekyk jy die knopperige takke dan wonder jy hoekom hulle liewer nie maar die blarebedekking behou het nie. Baie jare gelede het ek `n avokadopit geplant wat sowaar, my bleekgroen vingers ten spyt, tot wasdom gekom het. Maar helaas, slegs blare vir jare. Die gelykenis van die vyeboom het ek meermale aan hom voorgedra, maar sonder sukses. Toe lees ek ses maande gelede die slim botanikus van Kirstenbos se advies aan `n leser met `n soortgelyke probleem en volg dit getrou. Siedaar! My boom dra na bykans twintig jaar vrugte. Nie soveel dat ek `n markaandeel kan bekom nie, maar genoeg om my tuinierhart warm te laat klop. Duidelik was dit net die regte kos wat ontbreek het. My vrou herinner my aan Linda Rheeder wat eendag vertel het dat sy teenoor tannie Mavis gekla het oor haar plante so traag groei. Sy gee dan gereeld water. En kos? wou tannie Mavis weet. Hoe sou jy gelyk het as jy net water gekry het? Dis hoekom ons die eredienste bywoon, Stiltetyd hou en geestelike boeke lees. Water is nie genoeg nie; ons het kos ook nodig. Mag 2013 vir al ons lesers glimlagte bring en troos vir die trane. Pieter

3 Bladsy 3 N E D G E R E F G E M E E N T E C O N S T A N T I A Die stof staan ook by hierdie orrel Kobus het die oggend met groot dankbaarheid aangekondig dat `n welwillende gemeentelid die benodigde R15,000 geskenk het om die orrel reg te maak. Die werk is intussen gedoen en Ean sit die instrument behoorlik deur sy passies. Op die foto is Kobus Jordaan (staande), verantwoordelik vir die eiendomme van die gemeente en Ean Smit, die orrelis. Ons moet God vind, en hy kan nie gevind word in die geraas en rusteloosheid nie. God is die vriend van stilte. Sien hoe die natuur - bome, blomme en gras groei in die stilte, en hoe die sterre, die maan en die son, in die stilte beweeg... Ons moet tot stilte in staat wees om siele te raak. Moeder Theresa Music is a moral law. It gives soul to the universe, wings to the mind, flight to the imagination, and charm and gaiety to life and to everything. Plato

4 N E D G E R E F G E M E E N T E C O N S T A N T I A Bladsy 4 Van BADISA se webblad Blaaskans vir die Pastore van Khayelitsha Op 21 en 22 November 2012 was dit vir die Bediening vir Armoede en Sorg moontlik om 32 pastore van die Great Commission Minister s Network (GCMN) na Volmoed in die Hemel en Aarde Vallei te neem, vir n wonderlike blaaskans wat hulle so dringend nodig gehad het. Dit is moontlik gemaak deur die ruim donasie van mnr. Anton le Roux van Anton le Roux Vervoer van George. Die idee is gebore tydens n ontbyt by die Stellenberg Gemeente met die pastore. Die jong pastoor wat langs dr. Braam Hanekom gesit het tydens hierdie geleentheid, het vir hom verduidelik dat hulle almal moeg is van al die probleme waarmee hulle op n daaglikse basis, as gevolg van groot armoede in hulle gemeenskap, te kampe het. Die idee het by dr. Hanekom ontstaan om die pastore uit hulle daaglikse omstandighede weg te neem vir twee dae, sodat hulle net weer rustig kan word voor die Here en met hernude kragte na hulle werk kan terugkeer. Hy het die idee met mnr. Anton le Roux bespreek, wat aangebied het om n donasie te maak wat hierdie geleentheid moontlik sou maak. Dr. Deon Bruwer van die NG Kerk in SA se Hospitaalpastoraat wat ook deel is van die Bestuurspan vir Die Bediening vir Armoede en Sorg, het die geleentheid gefasiliteer en het gefokus op maniere om weer jou kragte te herwin tydens stresvolle omstandighede deur onder andere stil te word voor die Here. DE LA BAT IN CONSTANTIA Op Sondag, 2 September 2012, het die Jeug hulle uitreikprojek na die dowe gelowiges gehad. Die oggenddiens was gelei deur dr. Jan Nieder-Heitmann van die De la Bat gemeente in Bellville. Hy was vergesel deur die dowekoor en hulle tolk. Samesang was iets anders. Wat 'n ongelooflike ondervinding om die diens te ervaar saam met ons dowe broers en susters. Ons het net weer tot die besef gekom hoe dankbaar ons moet wees vir die gebruik van ons sintuie. Die kinders het die Muntlegging baie geniet en daar is op die grond rondgekruip en geskarrel om die geld mooi uit te pak terwyl die Senior kinders ons gaste met tee en koffie bedien het onder die leiding van tannie Aneen en Johan. Ons wil die gemeente bedank dat hulle ons uitreik ondersteun het en ons kon R758,95 aan die De la Bat gemeente oorbetaal. Die gemeente bedien die Dowes oor `n wye terrein en sukkel finansieel. Mag die Here die De la Bat gemeente se werksaamhede seën. Rina de Waal

5 Bladsy 5 N E D G E R E F G E M E E N T E C O N S T A N T I A Omdat ons klein is Toe God die wêreld gemaak het, het Hy ook baie diere gemaak. Adam se opdrag was om die diere te versorg. Daardie opdrag is vir ons vandag nog net so geldig. In die boek Jona lees ons die verhaal van Jona wat n opdrag van God ontvang het. n Opdrag beteken dat God vir hom n werkie gegee het wat hy moes gaan doen. Hy moes na die stad Nineve toe gaan, n groot stad wat vir Jona 3 dae sou neem om deur te loop. Hy moes vir almal sê dat hulle hulle moes bekeer, want God gaan die stad binne 40 dae verwoes. Die Bybel vertel ons nie hoe dit sou gebeur nie. Om daar te kom moes hy op n skip klim. Maar Jona was ongehoorsaam, omdat hy bang was. Miskien het hy gedink: Sê nou hulle oorval my en maak my dood! Daarom besluit hy toe om sy eie kop te volg, en hy klim op n skip wat na Joppe in Spanje gaan, weg van die Here af. Hy wou vir God vlug, hy het gedink God sal nie weet waar hy is nie, maar ons weet mos dat dit onmoontlik is né. Dan lees ons van alles wat met Jona gebeur het, en dat hy besef het hy kan nie vir God vlug nie. Toe weet hy dat hy moet doen wat God hom beveel het. Maar toe doen hy n vreemde ding. Nadat hy sy opdrag uitgevoer het, het hy buite die stad op n heuwel gaan sit en wag dat die verwoesting moes plaasvind! Ai, die Jona darem. God het geweet wat in sy hart omgaan, maar Hy was nog altyd lief vir hom. Omdat dit warm was, het God n komkommerplant laat opkom sodat hy in die koelte kon sit, maar die plant is later deur n wurm gevreet en het verwelk. Dit het Jona baie kwaad gemaak, want toe word die stad ook nie verwoes nie! Die koning het die boodskap gehoor, en besef dat hulle verkeerd was. Hy het almal beveel om God om vergifnis te vra vir hulle sonde en Hom te aanbid. Jona kon dit nie verstaan nie. Toe sê God vir hom: Jy is kwaad oor n plant waaraan jy nie gewerk het nie, maar ek mag nie die stad se mense wat nie weet wat reg of verkeerd is nie spaar omdat hulle berou het, en ook baie diere nie! (Julle kan gerus weer die storie gaan lees. Die boek het net 4 hoofstukke.) So het die Here ons nog steeds lief, en sorg Hy steeds vir ons, al is ons soms ongehoorsaam. Gee ons werklik ook om vir die diere wat God vir ons gegee het om na te kyk? Die ander dag het n baba-spreeu uit sy nes geval en baie seergekry. Gareth het hom opgetel, in n sagte doekie toegedraai en hom versorg. Hy het vir hom water en n bietjie kos gegee. Ongelukkig is die voëltjie die volgende oggend dood. Al wat ek vir julle hierdeur wil sê, is dat die Here elke lewende wese op aarde ken en liefhet. Die mossie en die spreeu, die olifant en die leeu. Baie liefde aan al die kinders, TANNIE HELMIEN

6 N E D G E R E F G E M E E N T E C O N S T A N T I A Bladsy 6 Die aand met Hester se JAO afskeid Dissie vis en hy s groot enig in sy soort, vinne soos neon heldergeel vanoggend nog het hy in die see gespeel. Ons sien hoe hulle hom aflaai, dis sy steaks wat hulle vir ons gaan braai. Dis ons agt wat hier kom eet Louis en Hester aan tafel sodat almal kan sien en almal kan weet: Dis vir Hester wat ons kom groet, kom sê: vrede, rus en liefde dis wat ons vir jou wil hê. Hoeveel jare se JAO werk? Hoeveel jare maak jy al jou merk? Kobus sorg vir wyn en orde, oksimoron ek weet, maar KYK na ons borde. Andries hou van chillie ons ander se monde willie. Dorothy luister met groot vermaak na die waiter se menu-toespraak. Fransien boei ons met stories oor verre Rusland ons hoor van sendelinge doer ver anderkant. Kobus sorg vir wyn en orde Joan eet drie borde kos dis vir almal n raaisel ons moet haar maar net los. Die fotograaf is Magdaleen die cute, jong visserman sê: Sy is dié een.

7 Bladsy 7 N E D G E R E F G E M E E N T E C O N S T A N T I A Louis meen sy vis is te rou. ruil dit om met Hester s n sommer gou. Kathleen bly tuis om te rus die pyn in haar been word nooit gesus. Hester, ons bid jou toe God se rykste seën op jou lewensreis se volgende been. Hoe kan iemand anders jou plek volstaan vir ons sê hoe dit met elke sendeling gaan? JAO gaan jou altyd met liefde onthou ons weet jy gaan ons in gebed voorhou. Die fotograaf is Magdaleen Kom koop toet-toet, kom koop toet-toet, my vissies van Valsbaai. Dorothy Cloete, Lookout Deck, Houtbaai, 6 November 2012 Die vergelyking tussen kerk toe gaan en bad Redes waarom ek nie meer bad nie. 1. Ek is as kind gedwing om te bad, nou bad ek nie meer nie. 2. Mense wat bad dink hulle is skoner as ander daarom bad ek nie. 3. Daar is soveel verskillende soorte seep ek kan nie besluit watter een om te gebruik nie, nou bad ek liewers glad nie. 4. Ek het op n stadium gebad, maar ek het verveeld geraak met die storie en toe besluit om nie meer te bad nie. 5. Ek bad net met spesiale geleenthede. 6. Baie van my vriende bad nie, so ek bad ook nie. 7. Ek sal dit dalk oorweeg om te bad wanneer ek bietjie ouer en vuiler is. 8. Ek het net nie nou tyd om te bad nie, my program is te vol. 9. Ek het al op verskillende plekke en in verskillende baddens gebad - maar die water is nooit die regte temperatuur nie. Ek kon nie een kry wat vir my lekker is nie. 10. Die ouens wat seep maak, is in elk geval net agter geld aan.

8 N E D G E R E F G E M E E N T E C O N S T A N T I A Bladsy 8 Skriflesing: Heb 10:19-25 Aflegging van Belydenis van Geloof Prediker : Ds. Wynand van Beek 25 November 2012 'n Belydenisaflegging gee jou die geleentheid om te sê dat ek Jesus wil volg, ek glo in Hom en Sy woorde, en ek wil 'n lewende lidmaat wees. Vandag is 'n hoogtepunt van jou geestelike lewe, maar môre is jy weer terug in die gewone lewe en dan voel God ver. Die lewe het 'n manier om ons in te suig maar ons moet probeer om naby God te bly. Die Hebreërboek is gerig aan Joodse gelowiges wat Christene geword het. Hulle het Jesus aangeneem as Saligmaker en Hom gevolg. Teen die tyd van die skrywe van die brief is Joodse Christene deur Jode vervolg en die Christen Jode het begin wonder of dit so 'n goeie ding is om Jesus te volg. Moet ons nie terugkeer na ons ou manier van lewe nie? Toe skryf die Hebreër skrywer sy brief om hulle te bemoedig. Hiermee wou hy sê: moenie teruggaan nie, om Jesus te volg is beter. Jesus is beter as engele, as die aartvaders en priesters en die Ou-Testamentiese wette. Die ou verbond was goed, maar die nuwe verbond is onbeskryflik beter. Hoekom? Omdat Hy julle nie net 'n bietjie lief het nie. Hy het julle so lief dat Hy gewillig is om te sterf aan die kruis vir al julle sondes. Hy het opgestaan, opgevaar om vir julle 'n nuwe lewe voor te berei en om vir julle te pleit by God. Hy het vir julle die Heilige Gees gegee. Vandag moet ons nog steeds naby aan Jesus bly. Drie maniere om naby aan Jesus te bly: 1. Jy kan naby Jesus bly deur gebed (vers 22). Net die hoë priester kon vir die sondes van die gemeente gaan offer in die Allerheiligste. Jesus het hierdie pad vir ons almal oopgemaak. Heeleerste ding in die oggend, bid vir die dag, bid vir leiding, hulp en krag vir die dag. Hand 17:27 - God het ons gemaak om Hom te soek. Hy is net 'n gebed ver. 2. Bly naby Jesus in Hoop (vers 23) Hy doen wat Hy beloof. God het 'n doel en 'n plan met ons elkeen se lewe en al die omstandighede in ons lewe om van ons beter mense te maak. Ek glo dat Jesus weer gaan kom. Hy wat hierdie dinge belowe, ons kan Hom vertrou. 3. Bly naby aan Jesus deur naby aan die kerk te bly (v 24-25); laat ons na mekaar omsien, mekaar aanspoor om na die eredienste te gaan. Daar word baie dinge van die kerk en kerkmense gesê, maar julle moenie julle daardeur laat intimideer nie. Jy ontsê jouself die geleentheid om God se genade te ontvang. God gee ons baie seëninge: maar die beste is Jesus Christus. Bly naby Hom, in gebed, hoop en deur Sy kerk (erediens/gemeente). Dit is die boodskap vir almal: ons het nodig dat Jesus Heer en Verlosser sal wees van ons lewe. Hy het vir jou gesterf sodat jy vir Hom kan lewe. Gemeente van Constantia, hou julle oë gevestig op Jesus, Leidsman en Voleinder.

9 Bladsy 9 N E D G E R E F G E M E E N T E C O N S T A N T I A 'n Helikopterrit en 'n erewag vir Susan Groenewald Susan Groenewald het einde verlede jaar afgetree na 37 jaar se diens by Westcott laerskool in Dieprivier. Op die heel laaste dag het al die kinders in die skool 'n erewag vir haar gevorm. Met so 'n afskeid is dit duidelik dat sy 'n geliefde onderwyseres en gewaardeerde kollega was. Verder was daar deurlopend vanaf die tweede kwartaal spesiale geleenthede gereël en geskenke uitgedeel aan haar, en beste van alles was 'n rit in 'n helikopter oor die Skiereiland. Susan sê, jy voel geliefd en gewaardeer, maar jy voel dit nie net nie, jy sien dit ook. As 'n nooi uit Bloemfontein het sy haar Engels hier in die Kaap kom leer tydens haar opleiding by die destydse Teachers' Training College Mowbray. Haar vader, Bill Rheeder, was vir jare betrokke by Die Volksblad as sirkulasie- en advertensiebestuurder. Na sy aftrede het hy en Susan se moeder waargeneem as huisouers vir die Burger Strandhuis in Muizenberg. Susan het saamgekom en haar skoolloopbaan op Bloemhof in Stellenbosch voltooi. Haar eerste pos was by Laerskool Zwaanswyk in die tyd dat mnr Ronnie Storm skoolhoof was. Na haar huwelik en die geboorte van haar dogter, Jolize, was sy vir drie jaar by Kirstenhof laerskool in diens. Met die geboorte van haar tweelingseuns, Gerhard en Johan, het sy besluit om vir 'n ruk voltyds ma te wees. Daarna was sy vir 'n jaar lank by die Ottery School of Industries, totdat daar 'n vakante pos in die junior primêre afdeling by Westcott laerskool ontstaan het en sy die pos aangebied is. Die Laerskool Westcott is reeds 107 jaar oud. Dit het die lewe begin as die Diep River Public School en het later 'n naamsverandering ondergaan na Diep River Primary en daarna eers as Westcott Primary School bekend gestaan. Die skool was oorspronklik gehuisves in die ou skoolgebou wat tans deur die Monterey skool gebruik word, op die hoek van Hoofweg en De Waalweg in Dieprivier. In die stigtingsjare was die skool omring deur wynplase met wingerde waar die woongebied van vandag is. Toe Susan in 1976 begin het, was dit 'n klein skooltjie met 300 kinders en steeds is daar minder as 500. Daardie jare was dit 'n dubbelmedium skool met klasse in Afrikaans en Engels met die fokus op kwaliteit onderrig. In 1978 is daar besluit dat daar te min Afrikaanssprekende kinders is om met die Afrikaanse klasse voort te gaan en teen 1980 was dit 'n volslae enkelmedium skool. Deur al die jare, eers onder mnr. Andy Henderson as skoolhoof, daarna, mnre. Godfrey Oliver en John Robertson is die skool bedryf as 'n Christelike skool met toegewyde en hardwerkende onderwysers wat ten volle deur die skoolhoof ondersteun word. Susan was die afgelope 30 jaar departementshoof van die grondslagfase. Sy het in die tyd twee meriete toekennings ontvang en met haar 30e jaar in diens van die departement was sy deur die premier van die Wes-Kaap genooi om 'n geleentheid in die Kunstekaap by te woon waartydens personeel vereer is vir hulle lang diensjare. Susan was in 2011 gekies as leieronderwyseres vir die opleiding van leerkragte onder die nuwe KABV kurrikulum in die suid-metropool gebied. Sy kyk terug op haar dienstermyn by die skool as baie goeie jare. (Vervolg op bl. 10.)

10 N E D G E R E F G E M E E N T E C O N S T A N T I A Bladsy 10 (Vervolg vanaf bl. 9) In 'n huldeblyk deur die skool aan Susan word daar onder meer met groot waardering gepraat van die rol wat sy gespeel het om kuns en musiek by die skool te bevorder en uit te brei, onder andere dat sy die koor en die Orff orkes begin het, en die musiek vir die skoollied gekomponeer het. Vir Susan is die heel lekkerste, nou dat sy afgetree is, dat die stryd teen die horlosie grootliks verby is. Sy kan so laat slaap as sy wil en haar dag beplan om haar te pas. Vader Tyd loer nie meer heeltyd oor haar skouer om haar aan te hits nie. Sy het allerlei planne soos om meer te reis, Holland en Italië is van die plekke wat sy baie graag sal wil sien, en om meer tyd aan haar stokperdjie, skilder, te bestee. Ons wens haar alles van die beste toe vir 'n lang en gelukkige aftrede. Drie susters en een GROOT KUIER Ek is die oudste van 3 susters. Die middelste een, Rianna, het in 1997 met haar gesin na Nieu-Seeland geëmigreer. Die jongste een, Antjie, hou skool in Mpumalanga. Ons 3 het laas saam met vakansie weggegaan toe ons al drie agter in die Valiant gesit het en saam met Pa-hulle die lang pad Hibberdene toe gevat het. Ons twee wat in Afrika agtergebly het, het besluit dat dit nou tyd is vir n GROOT KUIER! Drie vlugte later was ons by ons familie in die land, wat volgens hulle wat daar bly, glad nie nie meer die land daar onder is nie: Ons en ons NZ familie Ons het ons verkyk aan die grasgroen heuwels, die baie bome en heinings, die duisende koeie (in NZ word elke dag 7.5 miljoen koeie gemelk!), die skape, die blou mere en riviere, die sneeubedekte berge in die somer, die netjiese dorpies en die min mense. Ons het saam met hulle na hulle presbiteriaanse kerk op hulle dorp, Tokoroa, gegaan. n Klein groepie lidmate hou die gemeente aan die gang sonder n permanente dominee. Baie soos wat ons nou hier doen. Ons het gelag vir die vreemde plekname: Opotiki, Murupara, Whakatane, Whakapapa (terloops, n wh word uitgespreek as n f!) Na baie gesels en kyk na almal se werkplekke, koopplekke en kuierplekke het ons drie susters op ons eie op n toer na die Suid-Eiland vertrek.

11 Bladsy 11 N E D G E R E F G E M E E N T E C O N S T A N T I A Ons eerste stop was Christchurch. Daar kon ons eerstehands sien wat al die aardbewings aangerig het. Ons was verstom oor die resilience van die mense. Oral tussen die beskadigde geboue en oop spasies was: pockets of happiness; created by the people, blomme, bankies, slagspreuke (slogans) of kunswerke op mure, n klavier op n stoep waarop enige een sommer kan speel (selfs ek het!). In die middestad het hulle n mini-stad geskep met houers. Dit is pragtig geverf en word bv. as boetieks of koffiewinkeltjies gebruik. Container city Vandaar per bus na Queenstown, Arrowtown en Milford Sound ( n Wêreld erfenisgebied). Hierdie is n MOET SIEN as jy ooit daardie land besoek. En dan ook Mount Cooke. Tussen al die rondry en plekke besoek, het ons drie die beste tyd van ons lewe gehad. Ons kon baie ou koeie uit die sloot grawe; ontleed hoekom ons is soos ons is; hoekom ons lyk soos ons lyk ( wie het watter tannie se knieë en enkels geërf); hoekom het wie altyd ontsnap van skottelgoed was, ens., ens. Ons het baie magic moments geskep waarop ons nou kan teer. Ons het ook besef dat ons nie net susters is nie, maar ook vriendinne. Gaan ons weer saam toer? Beslis! Oor 3 jaar as die jongste een ook die groot 6 slaan maar dan iewers in Afrika. Myrtle Edwards Januarie 2013

12 N E D G E R E F G E M E E N T E C O N S T A N T I A Bladsy 12 A D R E S S E Constantia H/v Ladies Mile en Firgroveweg, KREUPELBOSCH, 7945 Telefoon/Faks (Kerkkantoor): E-pos: ngconstantia@xsinet.co.za Webwerf adres: Houtbaai-Kerkgebou: h/v Oxfordstraat & Albertweg, Houtbaai Webwerf adres : Eerste kwartaal 2013: Belangrike Datums Fliekvlooiaand - 24 Februarie Palmsondag - die begin van Heilige Week - 24 Maart Donkerdiens - 28 Maart - aanddiens Goeie Vrydag - 29 Maart, nagmaal en tee na die diens Paassondag - 31 Maart, met blomme wat agterna uitgedeel word aan ouer lidmate 'n Uitvoering van die Messias in die stadsaal oor Paasnaweek: ons wil dit ook gaan bywoon. DANKIE! DANKIE! Ons maak vordering! Desember was ons eerste 'spaarmaand' en nieteenstaande die feit dat ons heelwat geld aan die pastorie se opknapping moes spandeer, is die vroeë tekens bemoedigend! Ons kon ons uitstaande munisipale rekeninge vereffen, asook al n klein bedrag betaal van die sinodale kollektes wat nog nie oorbetaal is nie. Ons het n goeie dankoffer inkomste gehad, veral as ons in ag neem dat vorige Desembers soms maar dun was. Verder het sowat 70 gesinne/lidmate bygedra, waar ons ander maande sowat bydraes ontvang. Dankie vir almal se getrouheid, en veral aan ons Hemelse Vader! Ons is nog heelwat treë van dood-dollies af, maar die long walk to freedom gaan ons stap-virstap neem! Dankie aan elke lidmaat! Onthou: n vol emmer bevat maar net n klomp druppels. Ons het jou druppel nodig. Seëngroete Esmari namens Constantia Wyksraad